Testimonjanzi
Intervisti mar-Rebbieħa tal-Premjijiet għall-Iżvilupp tat-Turiżmu Responsabbli
Attrazzjoni għall-Viżitaturi
Rebbieħ - Attrazzjoni għall-Viżitaturi - Palazz tal-Gran Mastru
1. X’ispira l-investiment li l-kumpanija tiegħek daħlet fih, u kif temmen li jikkontribwixxi għal esperjenza turistika aktar responsabbli u sostenibbli?
Bħala l-aġenzija nazzjonali ta’ Malta għall-mużewijiet, il-konservazzjoni, u l-wirt kulturali, Heritage Malta hija fdata bis-salvagwardja tal-wirt kulturali tan-nazzjon u li tagħmlu aċċessibbli għall-ġenerazzjonijiet preżenti u futuri. Il-proġett ta’ riġenerazzjoni b’investiment ta’ €40 miljun tal-Palazz tal-Gran Mastru (parzjalment kofinanzjat mill-Fond Ewropew għall-Iżvilupp Reġjonali) jirrappreżenta wieħed mill-aktar investimenti kulturali sinifikanti fil-wirt kulturali ta’ Malta. Din l-inizjattiva hija konformi b’mod dirett mal-missjoni ta’ Heritage Malta li tressaq il-wirt eqreb lejn in-nies u li ssaħħaħ l-identità nazzjonali ta’ Malta permezz ta’ impenn kulturali sinifikanti.
Il-proġett kien immexxi mill-ħtieġa urġenti li l-Palazz tal-Gran Mastru, li jinsab fil-qalba tal-Belt Valletta, Sit ta’ Wirt Dinji tal-UNESCO, jiġi rrestawrat u mogħti ħajja ġdida. Minkejja r-rwol tiegħu fit-tul bħala s-sede ċentrali tal-poter minn mindu nbena fis-snin 1570—bħalissa għadu jospita l-Uffiċċju tal-President—il-Palazz dan l-aħħar kien jintuża prinċipalment bħala uffiċċji minn diversi entitajiet governattivi, kien jipprovdi aċċessibilità limitata għall-viżitaturi, u kien jeħtieġ titjib/restawr estensiv peress li ż-żoni interni storiċi tiegħu u t-teżori artistiċi imprezzabbli kienu kemmxejn moħbija.
Permezz ta’ riċerka storika metikoluża, konservazzjoni u ppjanar strateġiku, il-proġett ta’ riġenerazzjoni ttrasforma l-Palazz f’destinazzjoni kulturali sostenibbli. Żoni li qabel kienu ristretti issa huma miftuħa għall-pubbliku, u joffru esperjenza immersiva ta’ dar storika li tinforma u tispira. Il-proġett jintegra konservazzjoni intelliġenti ma’ infrastruttura ambjentali—inkluż impjant fotovoltajku u kontrolli ambjentali avvanzati—li jenfasizza impenn qawwi għall-ġestjoni ambjentali.
Billi jibbilanċja r-rwol tiegħu kemm bħala monument kulturali kif ukoll bħala r-residenza uffiċjali tal-President, il-Palazz tal-Gran Mastru issa jimmira li jilqa’ 350,000 viżitatur kull sena. Din ir-riġenerazzjoni televa t-turiżmu lil hinn mid-divertiment, billi tittrasformah fi pjattaforma għall-edukazzjoni, l-inklużività kulturali, u s-sostenibbiltà. Din isservi bħala punt ta’ riferiment nazzjonali għat-turiżmu kulturali sostenibbli u tistabbilixxi preċedent siewi għal inizjattivi simili internazzjonalment.
2. X’immotivak tieħu sehem fil-Malta Tourism Awards, u xi ksibt mill-esperjenza—personalment jew professjonalment?
Bħala l-aġenzija nazzjonali ta’ Malta fdata bil-preservazzjoni tal-wirt kulturali tal-pajjiż, Heritage Malta rat il-Premjijiet tat-Turiżmu ta’ Malta bħala pjattaforma ideali biex tenfasizza u tiċċelebra proġett li jgħaqqad il-preservazzjoni kulturali mal-iżvilupp tat-turiżmu sostenibbli. Il-parteċipazzjoni tagħna kienet motivata mill-opportunità li nippreżentaw ir-riġenerazzjoni tal-Palazz tal-Gran Mastru bħala inizjattiva ewlenija—waħda li mhux biss tavvanza l-istrateġiji nazzjonali tat-turiżmu iżda wkoll twettaq il-missjoni pubblika tagħna li nagħmlu l-wirt aċċessibbli u sinifikanti.
Il-Palazz tal-Gran Mastru mistenni jikkonsolida postu bħala waħda mill-attrazzjonijiet turistiċi ewlenin fil-Belt Valletta u f’Malta kollha kemm hi. Lil hinn mis-sinifikat storiku u arkitettoniku tiegħu, il-Palazz huwa simbolu qawwi tal-identità Maltija u l-kburija nazzjonali. Dan il-proġett—parzjalment kofinanzjat permezz tal-Fond Ewropew għall-Iżvilupp Reġjonali—mhux sempliċement dwar ir-restawr; huwa investiment ħolistiku fil-kapitali kulturali ta’ Malta, fl-inklużività, u fil-potenzjal turistiku fuq medda twila ta’ żmien.
Il-parteċipazzjoni fil-premjijiet ipprovdiet opportunità biex nippromwovu u naqsmu l-aħjar prattiki u approċċi innovattivi. Saħħet ukoll il-valur tal-kollaborazzjoni bejn is-setturi. Professjonalment, dan saħħaħ is-sħubijiet tagħna u fetaħ il-bibien għal iktar djalogu. Bħala aġenzija, kien mument ta’ kburija u sodisfazzjon li naraw ir-riżultat ta’ snin ta’ ppjanar, koordinazzjoni, u xogħol ta’ konservazzjoni rikonoxxut bħala kontribut vitali għan-narrattiva nazzjonali ta’ Malta u l-pożizzjoni internazzjonali tagħha fit-turiżmu.
3. Liema parir jew għarfien taqsam ma’ operaturi oħra tat-turiżmu li jittamaw li jagħmlu impatt sinifikanti fis-settur tat-turiżmu?
L-assi kulturali huma riżorsi uniċi u mhux rinnovabbli li jiffurmaw il-pedament tal-identità distinta ta’ Malta. L-investiment fl-iżvilupp sostenibbli, ir-restawr u r-rijabilitazzjoni tagħhom mhux biss itejjeb il-prodott turistiku tal-pajjiż permezz ta’ esperjenzi distintivi u insostitwibbli iżda jaġixxi wkoll bħala katalist għar-riġenerazzjoni ekonomika. Proġetti ta’ restawr u konservazzjoni joħolqu impjiegi lokali, jippreservaw ħiliet tradizzjonali, u jistimulaw setturi bħall-kostruzzjoni, l-artiġjanat, l-ospitalità, u l-industriji kreattivi. Ix-xogħol ta’ Heritage Malta fuq ir-riġenerazzjoni tal-Palazz tal-Gran Mastru huwa eżempju ewlieni ta’ kif is-salvagwardja tal-wirt mibni tista’ simultanjament issuq il-vitalità kulturali, it-tkabbir ekonomiku, u l-marka nazzjonali.
Biex it-turiżmu jiffjorixxi b’mod sostenibbli, il-proġetti kollha jridu jikkontribwixxu għad-diversifikazzjoni tal-prodotti filwaqt li jallinjaw mal-għan iktar wiesa’ li tissaħħaħ l-identità unika ta’ Malta. Bħala l-aġenzija nazzjonali, Heritage Malta toffri portafoll ewlieni ta’ attrazzjonijiet kulturali, iżda s-settur tat-turiżmu iktar wiesa’ jrid jikkumplimenta u jappoġġja dawn l-isforzi. Il-kollaborazzjoni tas-settur privat hija essenzjali. Aħna nħeġġu b’mod attiv lill-imsieħba biex jaħdmu magħna fil-finanzjament ta’ inizjattivi partikolari ta’ restawr u konservazzjoni, li mhux biss itejbu l-prodott ġenerali iżda jiżguraw ukoll sostenibbiltà fit-tul u sjieda kondiviża tal-wirt kulturali tagħna.
Il-partijiet interessati pubbliċi u privati għandhom jaħdmu flimkien biex iwasslu esperjenzi awtentiċi ta’ kwalità għolja li jqanqlu reazzjoni kemm mill-viżitaturi kif ukoll mir-residenti. Din ir-responsabbiltà kondiviża tirrifletti l-viżjoni u l-messaġġ ta’ Heritage Malta, Parti Minna, għaliex il-wirt ta’ Malta jappartjeni lil kulħadd. Il-preservazzjoni u l-preżentazzjoni tajba tiegħu ma humiex biss dmir iżda opportunità strateġika biex post Malta jiġi ddefinit fuq il-mappa tat-turiżmu dinji permezz tal-eċċellenza, l-awtentiċità u l-kura.
It-Tieni Post - Attrazzjoni għall-Viżitaturi - Ċentru Interattiv Esplora
1. X’ispira l-investiment li l-kumpanija tiegħek daħlet fih, u kif temmen li jikkontribwixxi għal esperjenza turistika aktar responsabbli u sostenibbli?
Meta konna qed niddisinjaw iċ-Ċentru tax-Xjenza Interattiva Esplora, ridna ninkorporaw pannelli solari fid-disinn strutturali għal diversi raġunijiet. L-aktar waħda ovvja hija li l-pannelli solari huma sors ta’ enerġija rinnovabbli, u bl-użu ta’ din is-sistema qed innaqqsu l-marka tal-karbonju tagħna u nkunu aktar responsabbli għall-ambjent. Madankollu, għalina bħala attrazzjoni edukattiva għall-viżitaturi, il-pannelli solari jservu wkoll bħala punt ta’ diskussjoni u mod kif ninvolvu lill-viżitaturi tagħna f’kull tip ta’ diskussjoni dwar l-impatt li x-xjenza, it-teknoloġija u l-inġinerija jista’ jkollhom fuq ħajjitna u fuq l-ambjent tagħna.
Bħala sit ta’ wirt storiku fil-Port il-Kbir, irridu noperaw fi ħdan restrizzjonijiet stretti li jfisser li ma stajniex ninstallaw il-pannelli solari bil-mod tas-soltu - fuq il-bejt - u din kienet sfida. Madankollu, bi ħsieb kreattiv, irnexxielna nsibu soluzzjoni li serviet diversi skopijiet – installajna l-pannelli solari tagħna fuq wieħed mill-passaġġi ewlenin ta’ barra fiċ-Ċentru, li jfisser li l-viżitaturi tagħna li jaqsmu l-livell ta’ fuq jistgħu jgawdu l-punt vantaġġuż mhux tas-soltu li jħarsu ’l isfel lejn il-pannelli, u l-viżitaturi fil-livell t’isfel jibbenefikaw mid-dell fis-sajf u l-kenn mix-xita fix-xitwa! Is-sit mhux tas-soltu tal-installazzjoni fisser li l-viżitaturi tagħna jistgħu jaraw il-pannelli solari mill-qrib u japprezzawhom b’modi differenti, kif ukoll ikollhom konversazzjonijiet dwar l-enerġija rinnovabbli.
Sibna li l-wiri ta’ miżuri ta’ sostenibbiltà, aktar milli jinħbew, ma huwiex biss opportunità tajba ta’ PR – jgħin ukoll biex ipoġġi s-sostenibbiltà fiċ-ċentru tal-esperjenza tat-turiżmu, u jfakkar kemm lill-viżitaturi tagħna kif ukoll lill-istaff tagħna li dawn il-kwistjonijiet huma importanti anke meta n-nies ikunu fuq btala u prinċipalment iffukati fuq li jkollhom esperjenza divertenti.
Meta s-sistema oriġinali tal-pannelli solari tagħna reċentement kellha bżonn tiġi aġġornata, iddeċidejna li kien proġett li kien jimmerita investiment għar-raġunijiet imsemmija hawn fuq, minkejja d-diffikultajiet li jiġi eżegwit proġett ta’ din l-iskala f’nofs attrazzjoni turistika popolari ferm bi ftit ħin ta’ waqfien!
2. X’immotivak tieħu sehem fil-Malta Tourism Awards, u x’ksibt mill-esperjenza—personalment jew professjonalment?
Meta smajna dwar il-Malta Tourism Awards, konna kurjużi dwar din l-inizjattiva, u nammetti li kien hemm element ta’ kurżità u kompetizzjoni biex naraw kif nikkomparaw ma’ attrazzjonijiet turistiċi oħra f’Malta! Madankollu matul it-triq, hekk kif tkellimt ma’ membri differenti tal-persunal f’timijiet differenti sabiex niġbor informazzjoni għall-applikazzjoni tagħna, bdejt napprezza verament kemm jagħmlu xogħol l-membri tat-tim tagħna fil-proġetti u l-inizjattivi tagħna, u d-dedikazzjoni għas-servizz tal-konsumatur li timbuttana lejn l-eċċellenza. Bħala attrazzjoni turistika, it-timijiet tagħna li jiffaċċjaw il-viżitaturi huma l-persunal li x-xogħol tagħhom huwa l-aktar viżibbli, u jista’ jkun faċli wisq li tinjora l-kontribut vitali tat-timijiet ta’ wara l-kwinti bħal dawk li wettqu l-proġett ta’ aġġornament tal-pannelli solari tagħna.
Ix-xogħol meħtieġ biex nipprepara l-applikazzjoni tagħna għall-Premju tani wkoll l-opportunitá li nħares lejn l-infrastruttura tas-sit tagħna li normalment ma ninvolvix ruħi fiha fl-operat tiegħi ta’ kuljum, u kien affaxxinanti li nitgħallem iktar dwar is-sistema tal-enerġija tagħna u li nara d-dashboard tal-pannelli solari u l-elettriku li ġġenerat is-sistema. Fuq kollox, madankollu, ħassejtni kburi iktar bix-xogħol eċċellenti li sar mit-timijiet responsabbli mill-Faċilitajiet u l-Manutenzjoni tagħna fit-tfassil, l-eżekuzzjoni u ż-żamma ta’ proġetti tekniċi bħal dawn.
3. Liema parir jew għarfien taqsam ma’ operaturi oħra tat-turiżmu li jittamaw li jagħmlu impatt sinifikanti fis-settur tat-turiżmu?
Naħseb li xi kultant jista’ jkun diffiċli li nipprijoritizzaw is-sostenibbiltà fis-settur tat-turiżmu għaliex diġà rridu niffaċċjaw sfidi sinifikanti sabiex noperaw, u kważi kważi nistgħu nħossu li huwa ħela li ninvestu ħin u flus fuq proġett li mhux se jtejjeb direttament il-KPIs kritiċi tagħna bħall-ammont ta’ viżitaturi u d-dħul. Madankollu nemmen li l-proġetti ta’ sostenibbiltà huma ta’ valur fuq medda twil ta’ żmien – apparti l-fatt li qed ngħinu biex nikkonservaw l-ambjent naturali tagħna, naħseb li t-turisti qed isiru iktar konxji tal-impatt tat-turiżmu fuq l-ambjent, u japprezzaw dejjem iktar lill-operaturi tat-turiżmu li qed jagħmlu sforzi biex jimplimentaw miżuri ta’ sostenibbiltà.
It-Tielet Post - Attrazzjoni għall-Viżitaturi - Akkwarju Nazzjonali ta’ Malta
1. X’ispira l-investiment li l-kumpanija tiegħek daħlet fih, u kif temmen li jikkontribwixxi għal esperjenza turistika aktar responsabbli u sostenibbli?
Fl-Akkwarju Nazzjonali ta’ Malta, ma qisniex l-investiment reċenti tagħna bħala lussu jew aġġornament fakultattiv, iżda bħala neċessità. Is-settur tat-turiżmu qed jevolvi malajr, u frankament, jekk m’intix qed tikkontribwixxi għas-sostenibbiltà llum, int parti mill-problema. L-investiment tagħna ffoka fuq it-titjib tal-edukazzjoni tal-viżitaturi, it-titjib tal-effiċjenza fl-enerġija, u t-tnaqqis tal-impronta ambjentali tagħna, partikolarment permezz ta’ sistemi iktar intelliġenti għall-kura tal-ħajja tal-baħar u programmi interattivi ta’ konservazzjoni.
L-għan tagħna huwa li noħolqu attrazzjoni li ġenwinament teduka lill-viżitaturi dwar l-ekosistemi tal-baħar u t-turiżmu responsabbli, filwaqt li nżommu lilna nfusna responsabbli wkoll wara l-kwinti. Dan ifisser nagħmlu xi ħaġa iktar minn sempliċement installazzjoni ta’ dwal LED u kontenituri tar-riċiklaġġ; l-inkorporazzjoni tas-sostenibbiltà fl-operat ta’ kuljum u fl-esperjenzi tal-viżitaturi b’modi li jistgħu jitkejlu, u mhux biss kummerċjabbli.
2. X’immotivak tieħu sehem fil-Malta Tourism Awards, u x’ksibt mill-esperjenza—personalment jew professjonalment?
Aħna ħadna sehem fil-Malta Tourism Awards għaliex is-settur jeħtieġ aktar operaturi biex jagħmlu progress, iqabblu l-isforzi tagħhom, u jkunu trasparenti dwar x’jaħdem u x’ma jaħdimx. Għalina, din kienet opportunità biex nittestjaw l-inizjattivi tagħna ma’ standard nazzjonali u naraw kif inhuma l-affarijiet mill-perspettiva ta’ esperti esterni. Fuq livell personali, huwa tfakkira li t-turiżmu ma huwiex statiku - dak li kien "tajjeb biżżejjed" ħames snin ilu m’għadux biżżejjed. Professjonalment, dan imbuttana biex nirfinaw l-istrateġiji tagħna u nkomplu nisfidaw lilna nfusna, iktar milli nikkuntentaw ruħna bis-suċċess tal-passat.
3. Liema parir jew għarfien taqsam ma’ operaturi oħra tat-turiżmu li jittamaw li jagħmlu impatt sinifikanti fis-settur tat-turiżmu?
Iffukaw fuq valur fit-tul, mhux rebħiet ta’ malajr. Involvi lit-tim tiegħek fil-livelli kollha, u mhux biss il-maniġment, fil-bini ta’ turiżmu responsabbli. Kun trasparenti mal-viżitaturi tiegħek dwar x’qed tagħmel u għaliex. U fl-aħħar nett, ifhmu li s-sostenibbiltà ma hijiex għodda ta’ kummerċjalizzazzjoni iżda strateġija ta’ sopravivenza għas-settur tat-turiżmu f’Malta għas-snin li ġejjin.
Ivvjaġġar u Turiżmu
Rebbieħ - Ivvjaġġar u Turiżmu - Rigo Malta DMC
1. X’ispira l-investiment li l-kumpanija tiegħek daħlet fih, u kif temmen li jikkontribwixxi għal esperjenza ta’ turiżmu aktar responsabbli u sostenibbli?
L-investimenti li saru f’dan il-qasam kienu parti minn strateġija, viżjoni u impenn ikbar li stabbilixxejna ftit snin ilu. Kienet esperjenza ta’ tagħlim għal kulħadd involut, speċjalment meta ma stajniex naraw b’mod sħiħ ir-riżultati, u għadna ma nistgħux nagħmlu dan peress li huwa proċess kontinwu. Konna qed naħdmu għal titjib b’mod perijodiku u inkrementali iżda meta rajna dawn l-isforzi jagħtu l-frott, dan ovvjament kien ta’ sodisfazzjon kbir. Ħassejna u nħossu li billi nagħmlu l-parti tagħna, żgħira kemm hi żgħira, ngħinu ninfluwenzaw lil oħrajn fl-industrija, kemm klijenti kif ukoll fornituri. Mill-inqas toħloq aktar għarfien li nittamaw li jwassal għal aktar azzjoni.
2. X’immotivak tieħu sehem fil-Malta Tourism Awards, u x’ksibt mill-esperjenza—personalment jew professjonalment?
Peress li konna diġà għamilna dawn l-inizjattivi qabel ma tnedew il-Premjijiet, kien ovvju għalina li nipparteċipaw. Il-proċess għenna wkoll nartikolaw u nirfinaw l-istrateġija tagħna għas-snin li ġejjin, filwaqt li r-rikonoxximent nazzjonali wera li x-xogħol iebes kollu ħalla l-frott, u li l-industrija qed tirrikonoxxi u tippremja l-eċċellenza f’dawn l-oqsma.
3. Liema parir jew għarfien taqsam ma’ operaturi oħra tat-turiżmu li jittamaw li jagħmlu impatt sinifikanti fis-settur tat-turiżmu?
It-turiżmu sostenibbli u iktar konxju qed jikber fost il-partijiet interessati fit-turiżmu u qed isir dejjem iktar importanti fir-relazzjonijiet mal-klijenti jew l-aġenziji li qed jimponu dan ir-rekwiżit fuq l-imsieħba tagħhom. Il-proċess għandu jibda ladarba s-sostenibbiltà tkun integrata fil-viżjoni tan-negozju u tinkiseb l-appoġġ tat-tim kollu. Bdejna b’livell inizjali ta’ għarfien u taħriġ bażiku online bħala l-ewwel pass li għenna nifhmu il-kunċett b’mod ħolistiku li għen lit-tim jallinja ruħu mal-viżjoni tal-kumpanija. Li tifhem li minkejja l-ħin u l-impenn meħtieġa, qed tagħti kontribut pożittiv jgħin ukoll biex tieħu d-deċiżjoni.
It-Tieni Post - Ivvjaġġar u Turiżmu - 20Twenty
1. X’ispira l-investiment li l-kumpanija tiegħek daħlet fih, u kif temmen li jikkontribwixxi għal esperjenza turistika aktar responsabbli u sostenibbli?
20Twenty ħadet l-opportunità li tibqa’ pass ’il quddiem matul il-perijodu tal-COVID-19, meta t-turiżmu kien milqut b’mod negattiv ħafna. Ħadna vantaġġ minn din il-pawża biex nevalwaw mill-ġdid il-prospetti tal-industrija, u rrealizzajna li kien wasal iż-żmien li nieħdu azzjoni meta tendenzi ġodda għamluha evidenti ferm li d-domanda għal prattiki sostenibbli kienet qed tikber. Il-pass loġiku u essenzjali li jmiss kien li nħaddnu l-bidla diġitali. Stajna nivvalutaw is-sitwazzjoni eżistenti tagħna u noħolqu pjan iktar strateġiku biex nilħqu l-għanijiet ta’ sostenibbiltà tagħna permezz tal-proċess ta’ applikazzjoni ta’ Travelife. Fl-istess ħin, l-iżvilupp u l-introduzzjoni ta’ Very Valletta ppermettewlna nibdew inpoġġu dawn l-ideat ġodda fil-prattika b’mod iktar malajr u effiċjenti. Erġajna lura iktar b’saħħitna u b’viżjoni iktar distinta għat-turiżmu sostenibbli bħala riżultat ta’ dan iż-żmien ta’ introspezzjoni u kreattività.
2. X’immotivak tieħu sehem fil-Malta Tourism Awards, u x’ksibt mill-esperjenza—personalment jew professjonalment?
Il-Malta Tourism Awards inizjalment ġew għall-attenzjoni tagħna permezz tal-korrispondenza bil-posta elettronika tal-MTA mal-partijiet interessati. Meta rrealizzajna li l-kategorija tal-Premju tat-Turiżmu Sostenibbli taqbel mill-qrib mal-viżjoni u l-prinċipji tagħna, it-tim tagħna ħassu ispirat biex jieħu sehem. Il-proċess tal-applikazzjoni wera li kienet esperjenza siewja u li tgħallimna; tatna l-opportunità li neżaminaw il-pożizzjoni eżistenti tagħna u l-għanijiet futuri sabiex insiru DMC tassew sostenibbli. Ġegħilna neżaminaw lilna nfusna b’mod kritiku, nidentifikaw l-oqsma ta’ żvilupp tagħna, u nsostnu d-dedikazzjoni tagħna għall-progress kontinwu. It-tim tagħna u n-negozju kollu kemm hu bbenefikaw minn din l-awtoevalwazzjoni. Għamlitna iktar determinati li nibqgħu proattivi u fuq quddiem nett.
3. Liema parir jew għarfien taqsam ma’ operaturi oħra tat-turiżmu li jittamaw li jagħmlu impatt sinifikanti fis-settur tat-turiżmu?
Bħala t-tieni fil-klassifika tal-Malta Tourism Awards fil-kategorija tat-Turiżmu Sostenibbli, rajna l-impatt sinifikanti ta’ prattiki responsabbli fit-trawwim ta’ esperjenzi ta’ vvjaġġar sinifikanti. Inħeġġu professjonisti oħra tal-industrija tal-ivvjaġġar biex javvanzaw billi jiksbu ċertifikazzjonijiet mingħand organizzazzjonijiet rispettabbli bħal Travelife, li jipprovdu approċċ b’metodoloġija għas-sostenibbiltà. Li tkun iċċertifikat juri impenn qawwi biex jittejbu l-effetti ekonomiċi, soċjali, u ambjentali tal-aspetti kollha tan-negozju tiegħek. Dan jinvolvi l-minimizzazzjoni tal-iskart, il-kollaborazzjoni mill-qrib mal-komunitajiet lokali, u l-għoti ta’ esperjenzi li jispiraw u jedukaw lill-vjaġġaturi. Tista’ ttejjeb il-kumpanija tiegħek u tgħin biex tinħoloq industrija tat-turiżmu iktar reżiljenti u responsabbli billi tinkorpora s-sostenibbiltà fil-valuri ewlenin tiegħek. Billi naħdmu flimkien, nistgħu noħolqu futur fejn it-turiżmu jkun ta’ benefiċċju għall-ambjent, l-ekonomija, u n-nies bl-istess mod.
Stabbiliment tal-Ikel
Rebbieħ - Stabbiliment tal-Ikel - De mondion
1. X’ispira l-investiment li l-kumpanija tiegħek daħlet fih, u kif temmen li jikkontribwixxi għal esperjenza ta’ turiżmu aktar responsabbli u sostenibbli?
F’The Xara Collection, is-sostenibbiltà mhix sempliċement valur, iżda huwa mod ta’ ħajja profondament imsejsa li jiggwida kull aspett tal-operazzjonijiet tagħna. Ħafna qabel ma s-sostenibbiltà saret kelma popolari, ħaddanna r-restawr u l-preservazzjoni tal-istorja, it-tradizzjonijiet u l-ambjent tagħna bħala prinċipji ewlenin. Dan l-impenn dejjiemi jidher permezz ta’ inizjattivi bħal Xara Gardens, li jinsabu biss ftit passi ’l bogħod minn The Xara Lodge, fejn nikkollaboraw ma’ bdiewa u koki esperti biex nikkultivaw prodotti staġjonali u mkabbra lokalment għar-ristoranti tagħna, inkluż id-de Mondion li għandu stilla Michelin. Billi ninvestu f’inizjattivi bħal dawn, mhux biss niżguraw l-iktar ingredjenti friski u nappoġġjaw lill-artiġjani lokali, iżda nnaqqsu wkoll b’mod sinifikanti l-impatt ambjentali tagħna; nippreservaw dak li napprezzaw illum biex ngħadduh lill-ġenerazzjoni li jmiss.
2. X’immotivak tieħu sehem fil-Malta Tourism Awards, u x’ksibt mill-esperjenza—personalment jew professjonalment?
Il-Malta Tourism Awards jistabbilixxu l-punt ta’ riferiment għas-sostenibbiltà, l-innovazzjoni, u l-eċċellenza fis-servizz, valuri li nemmnu li huma riflessi wkoll fil-prattiki tagħna stess permezz ta’ impenn għal turiżmu responsabbli u li jħares ’il quddiem. Fil-ħidma mal-MTA biex nuru s-sbuħija li Malta għandha x’toffri, nibqgħu ddedikati għal viżjoni progressiva li qatt ma twarrab il-valuri tal-passat, filwaqt li żżomm rispett profond għall-mistednin tagħna, l-istaff tagħna, u l-inħawi ta’ madwarna; approċċ li jkompli jsawwar u jħalli impatt pożittiv fuq is-settur tat-turiżmu.
3. Liema parir jew għarfien taqsam ma’ operaturi oħra tat-turiżmu li jittamaw li jagħmlu impatt sinifikanti fis-settur tat-turiżmu?
Aħna lkoll kburin ħafna bl-isforzi kontinwi tagħna biex nimbuttaw il-konfini gastronomiċi tagħna permezz tal-proġett sostenibbli uniku tagħna f’Xara Gardens, billi noħolqu dinja aħjar permezz tal-kċina u l-ospitalità. L-approċċ ta’ Xara għas-sostenibbiltà huwa eċċitanti, jaħseb ’il quddiem, u huwa impenjat profondament fl-isfidi globali iktar wiesgħa. Permezz ta’ inizjattivi pijunieri mill-kultivazzjoni ta’ prodotti f’Xara Gardens sal-promozzjoni ta’ edukazzjoni għolja ffukata fuq l-ospitalità, naħdmu biex narrikkixxu l-esperjenza tal-klijenti, intejbu r-relazzjoni bejn ix-xogħol u l-ħajja tat-tim tagħna, u nagħtu eżempji sinifikanti għal dinja li toffri ambjent aħjar biex tgħix fih u b’saħħtu. Il-kwalità hija apprezzata minn dawk li jirrikonoxxu x-xogħol iebes u d-dedikazzjoni tas-setturi kollha involuti, u flimkien, qed kontinwament naħdmu biex inpoġġu lil Malta fuq il-mappa gastronomika internazzjonali.
It-Tieni Post - Stabbiliment tal-Ikel - Trattoria Riccardo
1. X’ispira l-investiment li l-kumpanija tiegħek daħlet fih, u kif temmen li jikkontribwixxi għal esperjenza ta’ turiżmu aktar responsabbli u sostenibbli?
L-investiment tagħna fit-Trattoria Riccardo kien immexxi minn opportunità ċara biex nindirizzaw vojt fix-xena tal-ospitalità tat-Tramuntana ta’ Malta, speċifikament, il-ħtieġa għal ikel adattat għall-familji li joffri kemm kwalità kif ukoll kumdità. Ħlomna spazju akkoljenti fejn l-adulti setgħu jduqu kċina Taljana awtentika filwaqt li t-tfal jibqgħu involuti f’ambjent sikur u ddisinjat bir-reqqa. Mill-bidu nett, is-sostenibbiltà kienet pilastru ewlieni tal-viżjoni tagħna. Dan kien rifless fl-għażla tagħna ta’ soluzzjonijiet arkitettoniċi effiċjenti fl-enerġija, l-użu mill-ġdid ta’ materjali u għamara, u impenn qawwi biex inġibu l-ingredjenti lokalment. Dawn l-isforzi mhux biss jappoġġjaw it-turiżmu responsabbli iżda jnaqqsu wkoll l-impronta ambjentali tagħna. Nemmnu bis-sħiħ li l-ospitalità għandha tkun iktar mis-servizz; għandha tkun dwar it-trawwim ta’ esperjenzi sinifikanti u dejjiema filwaqt li naġixxu bħala amministraturi tal-ambjent u l-komunità.
2. X’immotivak tieħu sehem fil-Malta Tourism Awards, u x’ksibt mill-esperjenza—personalment jew professjonalment?
Il-parteċipazzjoni fil-Malta Tourism Awards kienet għażla mmotivata biex naqsmu l-vjaġġ tagħna u nikkontribwixxu għal djalogu iktar wiesa’ dwar ospitalità innovattiva, iffukata fuq il-mistednin, u sostenibbli. Kienet opportunità biex nenfasizzaw it-taħlita unika tagħna ta’ eċċellenza kulinari, esperjenzi ffukati fuq il-familja, innovazzjoni diġitali, u responsabbiltà ambjentali. Professjonalment, offriet punt ta’ riferiment siewi, li ppermettilna nkejlu l-progress tagħna kontra wħud mill-aktar atturi dinamiċi fl-industrija, filwaqt li niċċelebraw ukoll id-dedikazzjoni soda tat-tim tagħna. L-esperjenza uriet mill-ġdid l-impenn tagħna li nagħmlu impatt sinifikanti fix-xenarju tat-turiżmu ta’ Malta. Enfasizzat il-valur ta’ tmexxija b’għan u l-importanza li t-tkabbir tan-negozju jiġi allinjat mar-responsabbiltà soċjali u ambjentali.
3. Liema parir jew għarfien taqsam ma’ operaturi oħra tat-turiżmu li jittamaw li jagħmlu impatt sinifikanti fis-settur tat-turiżmu?
Biex joħolqu impatt dejjiemi, l-operaturi għandhom jagħtu prijorità lil esperjenzi li jservu ġenwinament kemm lill-mistednin kif ukoll lill-komunità iktar wiesa’. Dan jibda billi tifhem b’mod profond lill-udjenza tiegħek u b’impenn għal innovazzjoni kontinwa. Is-sostenibbiltà għandha tkun integrata minn taħt nett permezz ta’ disinn konxju, xiri responsabbli, u l-użu ta’ teknoloġiji intelliġenti li jtejbu l-effiċjenza mingħajr ma jikkompromettu l-kwalità. Investi fin-nies tiegħek, isma’ l-feedback, u ibqa’ flessibli f’settur li qed jevolvi b’rata mgħaġġla. Fl-aħħar mill-aħħar, impatt sinifikanti huwa r-riżultat ta’ għażliet maħsuba u intenzjonati li jgħollu s-sodisfazzjon tal-klijenti filwaqt li jippromwovu r-responsabbiltà ambjentali u soċjali fit-tul.
It-Tielet Post - Stabbiliment tal-Ikel - Hammett’s Monastik
1. X’ispira l-investiment li l-kumpanija tiegħek daħlet fih, u kif temmen li jikkontribwixxi għal esperjenza ta’ turiżmu aktar responsabbli u sostenibbli?
Aħna nemmnu li s-sostenibbiltà mhix biss xejra, iżda triq neċessarja ’l quddiem. Hija responsabbiltà li spiss tiġi injorata, iżda essenzjali meta nikkunsidraw l-impatt tagħna kemm fuq l-ambjent kif ukoll fuq is-soċjetà. It-taħriġ tiegħi bħala chef fl-uniku ristorant organiku u sostenibbli ċċertifikat mis-Soil Association ta’ Londra nebbaħ dawn il-valuri iktar kmieni. B’Hammett’s Monastik, iddeċidejna li nibnu kunċett madwar ingredjenti lokali, staġjonali u minn sorsi sostenibbli. Nużaw biss frott u ħaxix imkabbar lokalment, ħut sostenibbli lokali, u laħam jew minn sorsi lokali jew minn produtturi Mediterranji sostenibbli. Din il-filosofija testendi għax-xorb tagħna—nipproduċu xorb bi frott lokali staġjonali u nsibu nbejjed li huma organiċi jew bijodinamiċi minn madwar l-Ewropa. L-għan tagħna mhux biss li nservu b’mod responsabbli iżda wkoll li nedukaw lill-klijenti tagħna. Matul dan il-vjaġġ, sibna li l-akkwist lokali u staġjonali rriżulta fi prodott superjuri—kemm fil-kwalità kif ukoll fl-esperjenza.
2. X’immotivak tieħu sehem fil-Malta Tourism Awards, u x’ksibt mill-esperjenza—personalment jew professjonalment?
Diversi kollegi fl-industrija li segwew ix-xogħol tagħna ħeġġewna biex napplikaw, billi qalu li diġà konna allinjati mal-prinċipji tal-premju. Kien pjaċir ġenwin li nirċievu rikonoxximent għall-impenn u x-xogħol iebes li jidħol f’dak li nagħmlu kuljum. L-esperjenza saħħet il-valur li nibqgħu leali għall-prinċipji tagħna u l-impatt pożittiv li jistgħu jagħmlu.
3. Liema parir jew għarfien taqsam ma’ operaturi oħra tat-turiżmu li jittamaw li jagħmlu impatt sinifikanti fis-settur tat-turiżmu?
L-akbar lezzjoni li tgħallimna hija li t-triq lejn bidla sinifikanti mhix faċli. Kemm il-leġiżlazzjoni kif ukoll il-mentalità tal-fornituri jistgħu jkunu ta’ sfida. Madankollu, il-persistenza tagħti l-frott. Qed nibdew naraw il-benefiċċji, u l-aktar għarfien importanti li nistgħu noffru huwa dan: huwa possibbli. U peress li huwa possibbli, isir responsabbiltà. Ir-riżultat jiswa l-isforzi investiti.
Video Link- https://drive.google.com/drive/folders/1I4jlqdi2LX2ZboJveGEEIIqzgZ4xiLuZ
Akkomodazzjoni
Rebbieħ - Akkomodazzjoni - AX ODYCY
1. X’ispira l-investiment li l-kumpanija tiegħek daħlet fih, u kif temmen li jikkontribwixxi għal esperjenza ta’ turiżmu aktar responsabbli u sostenibbli?
L-investiment fil-Lukanda AX ODYCY twieled minn viżjoni ċara: li tittrasforma Qawra f’destinazzjoni vibranti s-sena kollha filwaqt li tindirizza l-limitazzjonijiet tal-infrastruttura skaduta, l-ineffiċjenzi ambjentali, u l-aspettattivi tal-klijenti li qed jinbidlu. Dan l-iżvilupp mill-ġdid ma kienx sempliċement dwar il-modernizzazzjoni ta’ proprjetà—kien dwar li nikkonċepixxu mill-ġdid l-ospitalità mil-lenti ta’ sostenibbiltà u innovazzjoni.
Kull aspett tal-proġett kien iddisinjat bir-reqqa biex jimminimizza l-impatt ambjentali, mill-integrazzjoni ta’ sistemi li jiffrankaw l-enerġija u l-ilma sal-adozzjoni ta’ materjali ekoloġiċi u inizjattivi għat-tnaqqis tal-plastik. Fl-istess ħin, għamilna enfasi qawwija fuq l-aċċessibbiltà, l-integrazzjoni tal-komunità, u t-trasformazzjoni diġitali biex ngħollu l-esperjenza tal-klijenti. Dan l-approċċ ħolistiku jirrifletti l-għanijiet iktar wiesgħa ta’ sostenibbiltà ta’ Malta u jistabbilixxi standard ġdid għat-turiżmu responsabbli fir-reġjun.
2. X’immotivak tieħu sehem fil-Malta Tourism Awards, u x’ksibt mill-esperjenza—personalment jew professjonalment?
Ġejna ispirati biex nieħdu sehem fil-Malta Tourism Awards bħala opportunità biex naqsmu kif AX ODYCY qed tiddefinixxi mill-ġdid ix-xenarju tal-ospitalità; bl-integrazzjoni tas-sostenibbiltà, l-innovazzjoni, u l-konnessjoni mal-komunità b’mod sinifikanti u li jħares ’il quddiem. Il-premjijiet servew bħala pjattaforma biex nirrikonoxxu d-dedikazzjoni u l-l-ħiliet innovativi tat-tim tagħna, li l-isforzi tiegħu kienu strumentali biex din il-viżjoni ambizzjuża titwettaq. Professjonalment, ir-rikonoxximent ikkonferma d-direzzjoni strateġika tagħna u ssolidifika l-pożizzjoni tagħna bħala mexxejja fit-turiżmu sostenibbli. L-esperjenza kienet sodisfaċenti ħafna; fakkarna li żvilupp mill-ġdid bi pjan għandu l-qawwa mhux biss li jtejjeb l-esperjenzi tal-klijenti iżda wkoll li jikkontribwixxi b’mod sinifikanti għall-industrija u l-komunitajiet li naqdu.
3. Liema parir jew għarfien taqsam ma’ operaturi oħra tat-turiżmu li jittamaw li jagħmlu impatt sinifikanti fis-settur tat-turiżmu?
Ibda b’sens ċar ta’ skop, wieħed li jqiegħed is-sostenibbiltà u l-impenn tal-komunità fil-qalba tal-operat tiegħek. Ħaddan soluzzjonijiet li jaħsbu ’l quddiem, kemm jekk permezz ta’ teknoloġija intelliġenti, prinċipji ta’ disinn ċirkolari, jew prattiki konxji mill-ambjent, u żgura li t-tim tiegħek jiġi msaħħaħ permezz ta’ taħriġ u żvilupp kontinwi.
Anke azzjonijiet li jidhru żgħar, bħall-eliminazzjoni tal-plastik li jintuża darba biss jew l-appoġġ tal-artiġjani u l-kultura lokali, jistgħu jwasslu għal impatt sinifikanti u dejjiemi. Fuq kollox, ibqa’ attent għall-bżonnijiet u l-vuċi tal-mistednin tiegħek u l-komunità tal-madwar. L-għarfien tagħhom huwa essenzjali biex jinħolqu esperjenzi turistiċi li mhux biss huma memorabbli, iżda wkoll responsabbli u rilevanti fid-dinja tal-lum.
It-Tieni Post - Akkomodazzjoni - The Embassy Valletta Hotel
1. X’ispira l-investiment li l-kumpanija tiegħek daħlet fih, u kif temmen li jikkontribwixxi għal esperjenza ta’ turiżmu aktar responsabbli u sostenibbli?
Fl-Embassy Valletta Hotel, l-investiment tagħna fi prattiki sostenibbli kien ispirat sa mill-pjanijiet bikrija tal-lukanda minn impenn profond biex nippreservaw il-wirt kulturali u ambjentali ta’ Malta għall-ġenerazzjonijiet futuri. Billi ninsabu fil-qalba ta’ Sit ta’ Wirt Dinji tal-UNESCO, nirrikonoxxu r-responsabbiltà li għandna fit-tiswir ta’ mudell turistiku li jirrispetta kemm il-komunità kif ukoll l-ambjent.
L-adozzjoni ta’ diversi inizjattivi u l-kisba taċ-Ċertifikat Green Key immarkaw pass importanti fil-vjaġġ tagħna, li jirrifletti sforzi bħall-implimentazzjoni ta’ sistemi effiċjenti fl-enerġija, il-promozzjoni ta’ prattiki sostenibbli fost l-impjegati u l-mistednin, u t-tnaqqis tal-użu tal-karta. Ingħaqqadna wkoll mal-Kunsill Lokali tal-Belt Valletta biex inħawlu siġar madwar il-belt. Dawn l-inizjattivi mhux biss inaqqsu l-impronta ambjentali tagħna iżda wkoll itejbu l-esperjenza tal-mistednin billi joffru ospitalità iktar awtentika u konxja.
Permezz ta’ dan l-approċċ, nimmiraw li mmexxu bl-eżempju, billi nuru li l-lussu u s-sostenibbiltà jistgħu jimxu id f’id—billi ninkoraġġixxu atturi oħra fl-industrija biex jadottaw prattiki responsabbli li jibbenefikaw kemm lin-nies kif ukoll lill-pjaneta.
2. X’immotivak tieħu sehem fil-Malta Tourism Awards, u x’ksibt mill-esperjenza—personalment jew professjonalment?
Konna mmotivati biex nieħdu sehem fil-Malta Tourism Awards bħala mod kif nirrikonoxxu x-xogħol iebes u d-dedikazzjoni tat-tim tagħna biex jintegraw is-sostenibbiltà fil-qalba tal-operat tagħna. Kienet ukoll opportunità biex naqsmu l-istorja tagħna, nitgħallmu minn oħrajn fl-industrija, u nikkontribwixxu għal kultura iktar wiesgħa ta’ turiżmu responsabbli f’Malta.
Li ġejna rrikonoxxuti fit-Tieni Post fil-kategorija tal-Iżvilupp tat-Turiżmu Responsabbli kien ta’ sodisfazzjon kbir. Dan ikkonferma mill-ġdid li l-għażliet li għamilna lejn operat sostenibbli mhux biss għandhom impatt iżda huma wkoll apprezzati fis-settur. Dan saħħaħ is-sens ta’ skop tat-tim tagħna u ispirana biex inkomplu nevolvu b’modi li jallinjaw mal-impenn tagħna lejn il-kwalità, is-sostenibbiltà, u l-involviment tal-komunità.
3. Liema parir jew għarfien taqsam ma’ operaturi oħra tat-turiżmu li jittamaw li jagħmlu impatt sinifikanti fis-settur tat-turiżmu?
Ibda bl-iskop u ibqa’ konsistenti. Impatt sinifikanti mhux dejjem jiġi minn investimenti kbar—ħafna drabi jibda b’bidliet żgħar u intenzjonati li jirriflettu l-valuri tiegħek u r-rispett tiegħek għall-komunità lokali u l-ambjent.
Involvi lit-tim tiegħek kmieni, issettja miri ċari ta’ sostenibbiltà, u involvi lill-mistednin tiegħek fil-vjaġġ. It-trasparenza u l-awtentiċità jgħinu ħafna fil-bini tal-fiduċja u l-lealtà.
Fl-aħħar nett, ftakar li t-turiżmu responsabbli ma huwiex biss xejra—huwa l-futur tal-industrija tagħna. Billi tħaddan is-sostenibbiltà, mhux biss qed tnaqqas l-impatt tiegħek, iżda wkoll qed ittejjeb l-esperjenza ġenerali tal-mistednin u ssaħħaħ l-identità tan-negozju tiegħek b’mod sinifikanti.
It-Tielet Post - Akkomodazzjoni - The Phoenicia Malta
1. X’ispira l-investiment li l-kumpanija tiegħek daħlet fih, u kif temmen li jikkontribwixxi għal esperjenza ta’ turiżmu aktar responsabbli u sostenibbli?
Is-suċċess tagħna li niksbu titjib fis-suċċess finanzjarju kien direttament marbut mal-fatt li niksbu titjib fis-sodisfazzjon tal-mistednin u sabiex niksbu dan huwa importanti li kontinwament naħdmu biex nagħtu l-ħajja lill-istorja unika kemm ta’ The Phoenicia Malta kif ukoll ta’ Malta permezz tal-esperjenzi li qed noħolqu għall-mistednin tagħna. Dan l-aħħar ħadna ċ-ċertifikazzjoni GSTC u impenjati bis-sħiħ li nkomplu nkabbru l-enfasi tagħna fuq is-sostenibbiltà bħala element ewlieni tal-istrateġija tagħna. Il-klijenti u l-mistednin qed isiru dejjem iktar konxji tal-importanza tas-sostenibbiltà meta jikkunsidraw l-għażla tagħhom ta’ akkomodazzjoni u apparti minn dan nemmnu li hija r-responsabbiltà tagħna li nagħmlu l-almu tagħna biex nipproteġu l-ambjent tagħna, il-komunità/destinazzjoni lokali tagħna li nagħmlu parti minnha u n-nies li naħdmu magħhom.
2. X’immotivak tieħu sehem fil-Malta Tourism Awards, u x’ksibt mill-esperjenza—personalment jew professjonalment?
Dejjem huwa motivanti għal wieħed mill-membri tat-tim tagħna li jkun jaf kemm huma apprezzati. Li nidħlu f’dawn it-tipi ta’ premjijiet huwa mod wieħed kif nistgħu niċċelebraw ix-xogħol iebes u l-impenn tagħhom mhux biss lejn il-lukanda tagħna iżda lejn l-industrija inġenerali. Nifhmu li dawn it-tipi ta’ premjijiet huma mmirati biex jiċċelebraw l-industrija ta’ Malta u huwa importanti li nappoġġjaw dawn l-inizjattivi.
3. Liema parir jew għarfien taqsam ma’ operaturi oħra tat-turiżmu li jittamaw li jagħmlu impatt sinifikanti fis-settur tat-turiżmu?
Qed naraw l-impatt f’xi nħawi ta’ Malta fejn ir-ritratti u r-rapporti tal-istampa ma humiex allinjati mal-Istrateġija tat-Turiżmu ta’ Malta, jiġifieri l-iżvilupp ta’ livell ogħla ta’ esperjenzi turistiċi ta’ kwalità għolja biex nattiraw kwantità iżgħar iżda kwalità ikbar ta’ turisti lejn il-gżira – jekk irridu nipproteġu dak li qed inwiegħdu lill-viżitaturi li jiġu Malta, ilkoll irridu nagħmlu l-parti tagħna biex nikkontribwixxu għall-wegħdiet li qed isiru permezz tad-diversi kampanji ta’ kummerċjalizzazzjoni biex niżguraw li d-destinazzjoni kollha kemm hi tkun tista’ tkompli twettaq dak li huwa mwiegħed. Dan jiżgura l-vijabbiltà fit-tul tal-industrija għal Malta.
Intervisti mar-Rebbieħa tal-Premju tal-Ħaddiem tas-Sena fit-Turiżmu
Tagħlim tal-Ilsien Ingliż
Maria Mifsud - Alpha School of English
Għaliex Jiena Għażilt Home Hosting u TEFL f’Malta - U Għaliex Inti Għandek Tagħmel Dan Ukoll
Peress li t-turiżmu huwa wieħed mis-setturi ewlenin fl-ekonomija Maltija, aħna bħala persuni tal-lokal nerfgħu responsabbiltà li nħallu impressjoni pożittiva fuq kull min iżur il-gżejjer tagħna. Din il-verità sempliċi iżda qawwija ġiet kondiviża miegħi waqt lecture ħafna snin ilu - u baqgħet miegħi minn dakinhar ’l hawn.
Meta l-familja tiegħi bdiet tospita studenti internazzjonali, ma kelli l-ebda idea kemm din l-esperjenza kienet se ssir sinifikanti u li tbiddilli ħajti. Għall-ewwel, dehret idea prattika - li nilqgħu viżitaturi fid-dar tagħna, naqsmu l-ikliet, noffru sodda komda, u jkollna ftit dħul. Iżda malajr inbidlet f’xi ħaġa ħafna aktar profonda: passjoni, skop.
Għandi notebook fejn inżomm rekords bir-reqqa tal-istudenti li ospitajna - ismijiet, pajjiżi, għeluq snin, ismijiet ta’ annimali domestiċi, passatempi - kull rekord hija tfakkira tal-istejjer uniċi li għaddew minn darna. It-tagħlim tal-Ingliż lilhom, sadanittant, sar estensjoni naturali tal-esperjenza ta’ akkoljenza. Il-lingwa tiftaħ il-bibien, u kull lezzjoni ssir pont bejn il-kulturi.
Il-Passjoni Tiltaqa’ mal-Professjoni
Kif jgħidu, “Agħmel dak li tħobb, u ma jkollokx għalfejn taħdem ġurnata f’ħajtek”. Kemm l-ospitar kif ukoll it-tagħlim huma aktar minn sempliċi xogħol għalija—huma espressjonijiet ta’ min jien. Kull student ġdid iġib perspettiva ġdida, ritmu ġdid, u opportunità ġdida biex Malta tiddi f’għajnejhom.
Kwistjoni ta’ Kburija u Responsabbiltà
Ir-rebħ ta’ titlu reċenti għall-isforzi tiegħi fis-settur tal-ospitalità kellu impatt sinifikanti fuq kif inġib ruħi. Inħoss sens ikbar ta’ responsabbiltà—li nkun aktar attenta għall-imġieba tal-istudenti tiegħi, għall-bżonnijiet tagħhom, għad-dettalji żgħar li joħolqu atmosfera ta’ dar.
Fhimt li kull tbissima, kull konverżazzjoni, u kull esperjenza kondiviża jikkontribwixxu għar-reputazzjoni ta’ Malta. M’aħniex biss nipprovdu servizzi; qed noħolqu memorji. Aħna l-ambaxxaturi ta’ Malta—interazzjoni waħda wara l-oħra.
Għaliex Għandek Tikkunsidra Din it-Triq
Jekk int Malti u qed tistaqsi kif jista’ jkollok karriera sinifikanti filwaqt li tikkontribwixxi għal pajjiżek, ikkunsidra dan:
• L-ospitalità fid-dar tippermettilek taqla’ dħul, tiltaqa’ ma’ nies minn madwar id-dinja, u turi l-kariżma u l-ospitalità famużi ta’ Malta, filwaqt li turi s-siti storiċi uniċi tagħna
• It-tagħlim tal-Ingliż jgħaqqdek mal-komunità globali. Ma huwiex biss dwar il-grammatika u l-vokabularju—huwa dwar it-tiswir tal-futur u l-bini ta’ ħbiberiji
• Id-dħul mill-ospitalità jista’ jvarja skont x’inhu inkluż:
Kamra tas-sodda privata
Kamra tal-banju privata
Kolazzjon, ikla ta’ nofsinhar u pranzu msajra inklużi x-xorb u l-ikel ħafif kollu
Tagħlim mid-dar
Tieħu lill-mistednin fuq tours turistiċi
• Nitkellmu dwar turiżmu ta’ kwalità; għalhekk, IRRIDU noffru servizzi ta’ kwalità: -
Pajjiżna jeħtieġ iktar nies biex jagħmlu pass ’il quddiem—mhux biss biex jipparteċipaw fit-turiżmu, iżda biex jelevawh.
Kun ir-raġuni sabiex xi ħadd isir iħobb lil Malta.
Kun l-ospitant li qatt ma jintesa.
Kun l-għalliem li ispirahom biex joħolmu bil-kbir.
Dan mhux biss xogħol. Hija vokazzjoni. U qatt ma kien hemm żmien aħjar biex twieġeb.
(Fl-2024 Malta rat 80,946 turist li żaru Malta bħala studenti tal-lingwi)
Ċentri tad-Diving
Jürgen Hinsen - Octopus Garden Diving Center
1. Liema kwalitajiet jew azzjonijiet fix-xogħol ta’ kuljum tiegħek temmen li jiddistingwuk u wasslu għan-nomina tiegħek?
L-entużjażmu tiegħi għad-diving u l-esperjenza tiegħi bħala trejner tal-instructors tal-lifeguards u b’iktar minn 25 sena esperjenza fil-mediċina tal-emerġenza fil-Ġermanja, jiena nagħti eżempju ta’ professjonaliżmu b’għanijiet ċari ta’ sigurtà, serjetà, u kwalità fid-diving. Bħala eżaminatur tal-instructors tal-SSI, paramediku tal-emerġenza u speċjalista tas-salvataġġ tal-ilma, huwa partikolarment importanti għalija li niżviluppa lil Malta f’waħda mid-destinazzjonijiet tad-diving l-iktar sikuri u mill-aqwa. It-taħriġ ulterjuri tal-professjonisti tad-diving fil-Jiem tal-Emerġenza tad-Diving annwali tagħna b’enfasi fuq is-sigurtà huwa vantaġġ ċar u proġett mudell mad-dinja kollha għal Malta, l-għalliema, u t-turisti tad-diving. Dan ix-xogħol jeħtieġ idealisti u issa ta l-frott għal iktar minn 4 snin u għen biex Malta ssir waħda mid-destinazzjonijiet tad-diving l-aktar sikuri fid-dinja. Il-passjoni tiegħi għall-isport bl-enfasi biex d-diving f’Malta jsir saħansitra iktar sikur wasslet għal din in-nomina.
2. Kif impattak dan ir-rikonoxximent, kemm personalment kif ukoll professjonalment?
L-ewwel u qabel kollox, ninsab kuntent li x-xogħol mill-qalb fuq dan il-proġett ġie rrikonoxxut u meqjus importanti b’rikonoxximent ta’ Premju tat-Turiżmu.
Ir-rispons mill-komunità tad-diving Maltija, iċ-ċentri tad-diving, u l-professjonisti tad-diving li attendew dawn il-korsijiet, kif ukoll il-fatt li huma ppreparati, mhux jibżgħu jirreaġixxu b’mod żbaljat, u l-evitar ta’ perikli potenzjali għall-għaddasa, għalija huma l-ikbar valuri għal dan il-proġett.
Għalija personalment u professjonalment, bħala fornitur ta’ attivitajiet ta’ diving f’pajjiż bħal Malta, huwa l-obbligu tiegħi li niggarantixxi s-sigurtà u l-benesseri għal kull turist tad-diving matul l-attivitajiet kollha tad-diving madwar il-gżejjer tagħna u li nkompli nimbotta l-proġett tagħna ’l quddiem biex nevita kompletament inċidenti kkawżati minn negliġenza u nuqqas ta’ professjonaliżmu.
3. Liema parir jew għarfien toffri lil ħaddiema oħra tat-turiżmu li qed jimmiraw li jagħmlu impatt sinifikanti fl-industrija?
Minkejja l-professjonaliżmu, l-isforz u l-esperjenza kollha tal-għalliema tagħna, huwa importanti li nkunu attenti biex nivvalutaw u nevitaw immedjatament perikli potenzjali.
Huwa biss permezz ta’ riflessjoni personali, edukazzjoni kontinwa u taħriġ dwar is-sigurtà li nistgħu niżguraw li dejjem nistgħu noffru lill-għaddasa kollha li jiġu Malta bħala viżitaturi avventura sikura u indimentikabbli. Dan jiżgura turisti li jiġu Malta ripetutament u jsaħħaħ l-industrija tad-diving tagħna u lil Malta bħala waħda mill-aqwa destinazzjonijiet tad-diving fid-dinja.
Servizzi tal-Ivvjaġġar u t-Turiżmu
Mario Cacciottolo - Dark Malta Tours
1. Liema kwalitajiet jew azzjonijiet fix-xogħol ta’ kuljum tiegħek temmen li jiddistingwuk u wasslu għan-nomina tiegħek?
Inqatta’ ħafna ħin nagħmel riċerka estensiva biex niżgura li l-istejjer li nirrakkonta fit-tours tiegħi jkunu rikki, interessanti, preċiżi, inqas magħrufa u fuq kollox - divertenti.
Inħares lejn kull tour b’dan l-aħħar punt f’moħħi. In-nies jistgħu jkunu interessati fl-istorja, jew f’parti speċifika ta’ Malta, iżda l-ħaġa ewlenija li jridu hija li jieħdu gost. Mixja ma’ Dark Malta Tours hija mod divertenti biex tisma’ dwar stejjer mhux tas-soltu mill-passat ta’ Malta, u għalkemm it-tours tiegħi huma ffurmati madwar informazzjoni storika, ma humiex lekċer tal-istorja. Fi tmiem it-tour, in-nies għandhom jitilqu wara li jkun ħadu gost.
2. Kif impattak dan ir-rikonoxximent, kemm personalment kif ukoll professjonalment?
Kont kburi ħafna li rbaħt dan il-premju, peress li ħdimt ħafna biex nibni Dark Malta Tours minn idea f’rasi b’identità tan-negozju turistika żgħira iżda stabbilita f’Malta. Kienet spinta ta’ fiduċja b’saħħitha li ġejt irrikonoxxut mill-MTA b’dan il-mod u kelli diversi gwidi sħabi jifirħuli, li kienet ħaġa ġentili ħafna u apprezzata ħafna.
3. Liema parir jew għarfien toffri lil ħaddiema oħra tat-turiżmu li qed jimmiraw li jagħmlu impatt sinifikanti fl-industrija?
Tkun xi tkun qed tagħmel, wettaqha b’passjoni u entużjażmu. Tagħmel differenza kbira.
Tista’ tibda l-idea tiegħek stess jew taħdem għal aġenzija – ma jimpurtax. Wettaq kull xogħol li tagħmel b’enerġija, kull darba.
Niggarantixxi li n-nies, u b’dan qed infisser prinċipalment it-turisti, verament jinnutaw lil xi ħadd li huwa involut, enerġetiku u divertenti biex tkun miegħu. M’għandekx għalfejn tkun qed tiċċajta l-ħin kollu, tista’ sempliċement tinvolvi ruħek man-nies b’mod amikevoli u twassal tour ta’ kwalità tajba billi tiffoka kompletament fuqhom u ġġiegħelhom iħossu li qed tieħu ħsiebhom.
Dawn l-affarijiet jgħinu ħafna biex in-nies igawdu l-ħin tagħhom f’Malta, u dak huwa l-fokus ewlieni għall-ħaddiema kollha tat-turiżmu
.
Stabbiliment tal-Ikel
Joseph Mark Mercieca - Country Terrace
Liema kwalitajiet jew azzjonijiet fix-xogħol ta’ kuljum tiegħek temmen li jiddistingwuk u wasslu għan-nomina tiegħek?
Il-karriera tiegħi tkopri aktar minn tliet deċennji, u kull lezzjoni li tgħallimt matul dak il-vjaġġ tikkontribwixxi direttament għal kull jum ta’ servizz f’Country Terrace. Ħafna ħin qabel ma jkun hemm l-ewwel klijenti bilqiegħda, indur mal-proprjetà kollha, niċċekkja l-bjankerija, il-ħġieġ, id-dwal u l-mużika. Nivverifika li l-ħaxix, il-ħut u ikel ieħor imwassal mas-sebħ jilħqu l-istandards tagħna, u ndur il-lista tar-riżervazzjonijiet sabiex inkun nista’ nilqa’ b’isimhom lill-klijenti li jerġgħu jużaw is-servizz tagħna. Dan il-kompitu bikri jagħti lit-tim mira ċara: perfezzjoni mill-ewwel platt. Imbagħad nagħti struzzjonijiet lill-kċina u lir-reception flimkien, għaliex servizz bla xkiel iseħħ biss meta l-koki u s-servers jaħdmu flimkien. Fl-aħħarnett, nibqa’ fuq il-post matul is-servizz, niggwida aktar milli nidderieġi, sabiex il-klijenti jħossu kura ġenwina aktar milli koreografija. Dawn id-drawwiet ta’ preparazzjoni, ħidma f’tim, u tmexxija prattika huma dak li nemmen li wasslu għan-nomina tiegħi.
Kif impattak dan ir-rikonoxximent, kemm personalment kif ukoll professjonalment?
Li rċevejt il-Premju tal-Ħaddiem tas – Sena fit-Turiżmu kien ta’ benefiċċju f’diversi modi. Fuq livell personali hija validazzjoni profonda tad-deċiżjoni li ħadt meta kont żgħir li nittratta l-ospitalità bħala l-passjoni tiegħi aktar milli xogħol regolari. Dan ifakkar lill-familja tiegħi fil-ħafna iljieli twal li kienu jiswew is-sagrifiċċju. Professjonalment, il-premju jitfa’ dawl fuq it-tim kollu ta’ Country Terrace. Il-bookings żdiedu, il-fornituri huma aktar ħerqana li jikkollaboraw, u l-istaff tiegħi jħossu mewġa ġdida ta’ kburija kull darba li xi mistieden jifirħilhom jew nirċievu feedback ieħor mill-isbaħ. Dan huwa ta’ sfida għalija wkoll biex nibqa’ nevolvi, kemm jekk dan ifisser li nżid aktar inbejjed mal-lista tal-inbejjed tagħna li dejjem tikber, ninvesti fit-taħriġ tal-istaff, jew nissieħeb ma’ bdiewa lokali biex nuru l-prodotti ta’ Għawdex. Ir-rikonoxximent huwa utli biss jekk imexxi t-titjib kontinwu, u dan huwa eżattament dak li għamel.
Liema parir jew għarfien toffri lil ħaddiema oħra tat-turiżmu li qed jimmiraw li jagħmlu impatt sinifikanti fl-industrija?
Ibda billi tħobb is-sengħa. Il-ħiliet tekniċi jistgħu jiġu mgħallma, iżda l-entużjażmu ġenwin għas-servizz huwa dak li jimporta l-aktar. Impenja ruħek għat-tagħlim tul il-ħajja, attendi workshops, duq ħafna, ivvjaġġa meta tista’, u aqra dwar ix-xejriet lil hinn mir-rwol immedjat tiegħek. Investi fit-tim tiegħek qabel ma tinvesti f’tagħmir. Tim motivat jkun aħjar mill-iktar apparat modern kull darba. Ittratta lil kull mistieden bħala sieħeb fis-suċċess tiegħek, isma’ l-feedback tagħhom, kemm jekk pożittiv kif ukoll negattiv, adatta fejn sensibbli, u qatt tinsa li l-klijenti sodisfatti jsiru l-aqwa ambaxxaturi tiegħek. Mistieden li gawda l-ikel nhar ta’ Tlieta għandu jirċievi l-istess standard għoli nhar ta’ Sibt. Il-passjoni, l-edukazzjoni, il-kura tat-tim, l-iffukar fuq il-mistieden, u l-konsistenza soda huma dak li jistgħu jwasslu lil kwalunkwe professjonist tat-turiżmu ’l bogħod.
Akkomodazzjoni
Christopher Tabone - Malta Marriot Resort and Spa
1. Liema kwalitajiet jew azzjonijiet fix-xogħol ta’ kuljum tiegħek temmen li jiddistingwuk u wasslu għan-nomina tiegħek?
B’iktar minn erba’ deċennji ta’ esperjenza fl-ospitalità, nemmen li s-snin twal tiegħi fl-industrija iffurmaw perspettiva li ftit oħrajn għandhom. L-età u l-esperjenza tiegħi ppermettewli nagħti l-ħajja lill-valur ewlieni ta’ Marriott ta’ “Be Caring” b’mod profondament personali u sinifikanti. Nemmen bis-sħiħ li nkun viżibbli u preżenti - inqatta’ ħin fil-lukanda, ninvolvi ruħi direttament mal-mistednin, nisma’ l-feedback tagħhom, u nantiċipa l-bżonnijiet tagħhom. Dik l-interazzjoni wiċċ imb’wiċċ mhux biss iżżid is-sodisfazzjon tal-klijenti iżda tispira wkoll kunfidenza u tama.
Importanti wkoll hija l-konnessjoni tiegħi mat-tim. Jiena mmexxi bl-eżempju, inxammar il-kmiem u naħdem spalla ma’ spalla mal-kollegi fid-dipartimenti kollha. Dan l-approċċ prattiku jrawwem sens qawwi ta’ ħbiberija, professjonaliżmu, u rispett reċiproku, u fl-aħħar mill-aħħar joħloq kultura ta’ servizz li l-klijenti tagħna jħossu malli jidħlu mill-bieb. Nemmen li hija din it-taħlita ta’ impenn personali, għarfien operattiv, u tmexxija ffukata fuq in-nies li ddistingwietni u wasslet għal dan ir-rikonoxximent sinifikanti.
2. Kif impattak dan ir-rikonoxximent, kemm personalment kif ukoll professjonalment?
Li nirċievi l-Premju tal-Ħaddiem tas-Sena fit-Turiżmu kienet esperjenza kemm umli kif ukoll sodisfaċenti ħafna. Fuq livell personali, għamlitni kburi li nara karriera tul il-ħajja fl-ospitalità ċċelebrata b’mod daqshekk pubbliku u prestiġjuż. Huwa tfakkira li d-dedikazzjoni, il-konsistenza, u l-passjoni għas-servizz tassew jagħmlu differenza - mhux biss għall-klijenti, iżda għall-industrija iktar wiesgħa.
Professjonalment, dan ir-rikonoxximent tani skop ġdid. Poġġieni f’pożizzjoni bħala mentor u mudell għal oħrajn fil-qasam, partikolarment il-ġenerazzjoni żagħżugħa ta’ professjonisti tal-ospitalità. Naraha bħala opportunità biex nuża l-vjaġġ u t-tagħlimiet tiegħi biex nispira lil oħrajn - speċjalment lil dawk li juru impenn, huma ħabbrieka u ħerqana li jikbru fis-settur. Fi żmien meta l-industrija lokali qed teħtieġ dejjem iktar mexxejja b’esperjenza u b’ħiliet kompluti, nittama li dan ir-rikonoxximent iservi ta’ inkoraġġiment għal oħrajn biex ifittxu l-eċċellenza, iħaddnu t-tagħlim, u jkunu kburin bil-kontribut tagħhom għax-xenarju turistiku ta’ Malta.
3. Liema parir jew għarfien toffri lil ħaddiema oħra tat-turiżmu li qed jimmiraw li jagħmlu impatt sinifikanti fl-industrija?
Kun leali lejk innifsek. Agħraf il-punti tajbin tiegħek u toqgħodx lura milli turi l-passjoni tiegħek - hija waħda mill-aktar għodod qawwija li għandek. L-ospitalità ma hijiex sengħa moħbija; għandha tiġi pprattikata fil-miftuħ, b’enerġija u kburija. Agħmilha l-missjoni tiegħek li tgħin lil ħaddieħor jikber. Aqsam l-għarfien, imxi bl-eżempju, u dejjem inkoraġġixxi l-kollaborazzjoni. Għin lit-tim tiegħek jifhem id-differenza bejn it-tajjeb u l-ħażin b’mod li tikseb ir-rispett tagħhom u dan jimmotivahom biex jagħmlu aħjar.
Agħmel sforz żejjed. Toqgħodx biss li tissodisfa l-aspettattivi - immira li taqbiżhom. Fassal l-għanijiet tiegħek fuq it-tkabbir personali u professjonali billi titgħallem minn dawk li għandhom iktar esperjenza u dejjem ibqa’ aġġornat max-xejriet emerġenti u l-aspettattivi tal-klijenti. Li tkun prattiku huwa importanti, iżda li tkun adattabbli huwa vitali. Ħaddan il-bidla bħala triq għat-titjib.
Fl-aħħarnett, ibqa’ b’saqajk mal-art. Ibqa’ qrib it-tim tiegħek, ifhem il-bżonnijiet tagħhom, u qatt tiżola lilek innifsek mir-ritmu ta’ kuljum tal-operat. Ibni relazzjonijiet, ibqa’ flessibbli, u kisser l-ostakli qabel ma jsiru ħitan. Il-passjoni, meta tkun viżibbli u sinċiera, taqla’ r-rispett. U fl-aħħar mill-aħħar, hija din il-passjoni - flimkien mal-umiltà u l-integrità - li se tħalli impatt dejjiemi fuq il-mistednin tiegħek, il-kollegi tiegħek, u l-industrija kollha kemm hi.