PERSUNI NATURALI

​

Aħna, l-Awtorità Maltija għat-Turiżmu, bl-uffiċċju reġistrat f’Building SCM 01, Suites 301–306, SmartCity Malta, Ricasoli SCM 1001, il-Kalkara, Malta, nieħdu l-privatezza tiegħek bis-serjetà. Jekk jogħġbok ħu l-ħin biex taqra dan l-avviż qabel tissottometti din il-formola. 

  

GĦALIEX GĦANDNA BŻONN ID-DATA PERSONALI? – Għandna bżonn id-data personali tiegħek (l-informazzjoni li qed tipprovdilna fil-formola tan-nomina ta’ hawn fuq u li tidentifikak bħala individwu), kif ukoll id-data personali tal-persuna li qed tinnomina (il-“persuna nominata”), sabiex nipprovdu s-servizzi mitluba, jiġifieri biex nirċievu u nevalwaw in-nomini għall-’Malta Tourism Awards’, kif ukoll biex norganizzaw u namministraw iċ-ċerimonja tal-għoti tal-premjijiet. Għaldaqstant, f’dan il-każ, il-bażi legali tagħna għall-ipproċessar hija: (i) fir-rigward tad-data personali tiegħek, il-ħtieġa għall-eżekuzzjoni ta’ kuntratt miegħek; u (ii) fir-rigward tad-data personali tal-persuna nominata, il-ħtieġa għall-finijiet tal-interessi leġittimi tagħna li norganizzaw il-’Malta Tourism Awards’. 

  

IMPORTANTI: Billi tipprovdilna d-data personali tal-persuna nominata, inti b’dan tikkonfermalna li għandek l-awtorità li tipprovdilna tali data personali. 

  

MA’ MIN NAQSMU D-DATA PERSONALI TIEGĦEK? - Id-data personali se tkun disponibbli għal dawk il-persuni fl-organizzazzjoni tagħna li jkollhom bżonnha sabiex iwettqu d-dmirijiet tagħhom b’rabta mal-’Malta Tourism Awards’. Aħna naqsmuha wkoll ma’ Tally.so, il-fornitur ta’ din il-formola, li neċessarjament jipproċessaw id-data personali li int tipprovdi fil-formola meta tissottomettiha. Aħna ma niżvelawx id-data personali tiegħek jew dik tal-persuna nominata lil persuni oħra minbarra dawk imsemmija hawnhekk, sakemm ma nkunux obbligati nagħmlu dan bil-liġi. Sakemm ma ninfurmawkx mod ieħor, id-data tiegħek se tibqa’ f’kull ħin fl-UE/ŻEE. 

  

GĦAL KEMM ŻMIEN SE NŻOMMU D-DATA PERSONALI TIEGĦEK? – Aħna se nżommu d-data personali biss sakemm ikun meħtieġ. Il-ħtieġa tiddependi minn obbligi legali jew minn ċerti drittijiet li jista’ jkollna. Pereżempju, meta nqisu li d-data personali tkun meħtieġa sabiex niddefendu ruħna kontra talbiet ċivili li jistgħu jitressqu kontrina, nistgħu nżommu d-data sakemm jibqa’ jeżisti dak ir-riskju (normalment għal ħames [5] snin mit-tmiem tar-relazzjoni kuntrattwali tagħna miegħek, jew għal sentejn [2] mid-data ta’ inċident rilevanti jekk ma tkun teżisti ebda relazzjoni kuntrattwali bħal din). 

  

X’INHUMA D-DRITTIJIET TIEGĦEK DWAR IL-PROTEZZJONI TAD-DATA? - Bħala “suġġett tad-data”, kif mifhum skont il-liġijiet applikabbli dwar il-protezzjoni tad-data, għandek għadd ta’ drittijiet li japplikaw taħt ċerti kundizzjonijiet u f’ċerti ċirkostanzi, inklużi dawn li ġejjin: 

• Id-dritt ta’ aċċess għad-data personali tiegħek ipproċessata minna; 

• Id-dritt li titlobna nirrettifikaw data personali mhux preċiża li tikkonċernak; 

• Id-dritt li titlobna nħassru d-data personali tiegħek (“id-dritt li tintesa”); 

• Id-dritt li titlobna nillimitaw (jiġifieri, naħżnu iżda ma nkomplux nipproċessaw) id-data personali tiegħek; 

• Id-dritt li titlobna nipprovdulek id-data personali tiegħek f’format strutturat, użat b’mod komuni u li jinqara minn magna, jew (fejn teknikament fattibbli) li din tiġi ttrasferita direttament lil kontrollur tad-data ieħor (“id-dritt għall-portabbiltà tad-data”); 

• Id-dritt li tirtira kwalunkwe kunsens li tkun tajtna fi kwalunkwe ħin (jekk ikun hemm); 

• Id-dritt li toġġezzjona għall-ipproċessar tagħna tad-data personali tiegħek (fejn ma jkunx hemm kunsens); 

• Id-dritt li tressaq ilment quddiem l-awtorità superviżorja rilevanti. 

  

Għal aktar informazzjoni dwar kif l-Awtorità Maltija għat-Turiżmu tipproċessa d-data personali tiegħek, inti mistieden iżżur il-Politika ta’ Privatezza tagħna hawn: https://www.visitmalta.com/en/privacy-policy-and-cookie-policy/ 

  

Tista’ tikkuntattjana wkoll billi tikteb lil: dataprotection.mta@visitmalta.com